К началу

Переклад давньоруською — Андрій Андрусяк
Переклад iз середньовалійської — Дмитро Храпов

Касіў Ясь канюшыну,
Паглядаў на дзяўчыну :)

Кылоухъ и Олъвинъ

Килидъ иже нашьскы Товарищь иже сынъ Келидонь Оуледига иже Воєвода Каледоньскыи въсхотѣ женѫ доблюѭ ıако же и самъ · а се бысть Голеоудидь ıаже нашьскы Свѣтьлъ Дьнь ıаже дъчи Анълаоужа Оуледига иже Воєвода Бързыи · Оже ѭ залежи и въста землıа на молитъвѫ оузьрѣтъ бѫдеть ли имъ настольникъ · И моливъшеи же сѧ вьсеи земли роди сѧ сынъ · и въ годинѫ же єи зачѧвъшеи и изоумѣ сѧ ıако и не бѣ притѣкаѭче къ жилищемъ · оже прииде єи часъ и оурозоумѣ · а съдѣıа сѧ въ мѣстьци идеже свинарь ходѧ съ свиньскымь стадъмь · а страхъмь ѿ свинии кънѧгыни роди · и възѧ свинарь мальць и принесе и́ въ дворъ · и крьстишѧ мальць и нарекошѧ ємоу имѧ Кылоухъ а нашьскы Хоудоє Поросѧ : бысть бо наиденъ на свиньскомь поли · нъ бѣ мальць добль и бѣ братанъ Арътоурь та и въдашѧ мальць печальникомъ

По симь розболѣ сѧ мальчıа мати Голеоудидь дъчи Анълаоужа Оуледига · и покличе мѫжь свои къ собѣ и рече къ нємоу · помьроу сею болєстью и въсхочеши иноую женоу · а въ се веремѧ ростачають жены дары нъ не годѣ ти обидѣти сынъ · по симь же молю ти сѧ да оли не ищи жены толи оузьриши шипъкъ о дъвою головоу на моєи могылѣ

И тъ сѧ оурече · а та си покличе прозвитеръ молѧче сѧ ємоу а чистить могылѫ годъ въ годъ а бы тоу ничьто же не възросло · и помьре кънѧгыни · оутро же въ оутро въсълаѧ кънѧзь слоугѫ позьрѣти нѣ ли чьто възросъшего на могылѣ · по семи нъ лѣтъ охаби сѧ прозвитеръ чего же сѧ кънѧгыни оурече

Одиноѭ бѣ кънѧзь въ ловѣхъ · приѣха же къ могылью хотѧ видѣти могылѫ а довѣдѣти искати ли жены · и оузьрѣ шипъкъ а оузьрѣвъ възѧ съвѣтъ идеже собѣ искати жены · рече же одинъ ѿ вѣтьникъ Знаю ти женоу годьноу · а се жена Догежа кънѧжıа · и cъдоумашѧ сочити ѭ · И изгоубивъше кънѧзıа приведошѧ єго женѫ домови и єѣ инокоуѭ дъчерь · и объѧшѧ собѣ землѭ кънѧжѭ

Одиноѭ жена вышьдъши походитъ и пристѫпи къ домови старѣи вълхъви безѫбѣи та же бѣ живѫчи въ городѣ

И рече кънѧгыни Вълхъви Б҃га ради даси ли ми слово на въпросъ? Къде дѣти ѿ моужıа иже мѧ въсхытилъ?
И рече вълхы Нѣсть ємоу дѣтии
И рече кънѧгыни Воле ми оже єсмь пришьла къ бещѧдоу
И рече вълхы Симь сѧ не пеци · проречено бо ıако боудеть ємоу наслѣдъкъ · некъли быти наслѣдъкоу и ѿ тебе оубо не было моужю наслѣдъка ни ѿ кого же · нъ не скърби · вѣдѣ бо имать сынъ

И жена рада иде домови и рече къ мѫжю Чемоу ѿ мене таиши сыноу своєго?
И рече кънѧзь Паче ѿ тебе не оутаю

И бѣ посълано по молодьць и тъ приде къ двороу и рече къ нємоу мачеха Годъ ти єсть женоу приѧти молодьче и єсть ми дъчи годьна коємоу жьдо въ свѣтѣ доблємоу моужю
И рече молодьць Нѣсмь още о годѣхъ да женоу приѧти
И та рече Заклинаю ти соудъ а толи сѧ не набодеть родъ твои жены оли приємлєши Олъвень Бѣлыи Слѣдъ дъчерь Исъбададеню Бенъкаоура могоута

Та сѧ заръдѣ молодьць а любы къ дѣвѣ испълни оудеса єго аже и не бысть видѣлъ ѭ николи же · и рече єго отьць Сыноу чемоу сѧ єси заръдѣлъ? Чьто сѧ съдѣıало?
И рече Мачеха мѧ заклѧла а толи ми не боудеть жены оли възьмоу женоу Олъвень дъчерь Исъбададеню Бенъкаоура могоута
И рече отьць Льгъко ти єсть се оучинити · Арътоуръ єсть братанъ твои · иди къ Арътоурови а ти кыку оуємлєть и моли сѧ ємоу о семь ıако о дароу

И поѣде молодьць на жеребьци а жеребьць тъ ѡ свѣтьлѣи головѣ ѡ сѣрѣи а вьрста ѥмоу четыре зимы и добро съчьтена стопа и копыта ıако скалъви и трѫбьна бръзда золота въ рътѣ · а сѣдѣаше молодьць въ дорогомь седьлѣ въ золотомь и острѣ копьи сребрьнѣ въ рѫкоу єго · а пакы ратьна секыра въ рѫцѣ єго и въдълѥ секыра ıако рѫка мѫжьска ѿ краıа до краıа · высѣкла бы кръвь ѿ вѣтра и была бы бържьши наибържьшєѣ росины падаѭчи съ стьбла на земь коли то роса наитѧжьчаиши въ изоцѣ въ мѣсѧци · и бысть на бедрѣ ѥго мечь о золотѣи рѫкоѧти а голомѧ золотоѥ а щитъ єго золотъмь оусвѣченъ ıако мълньєѫ небесьноѭ а ободъ ѥго бѣлоѭ костьѭ оудѣланъ · и быста переди ѥго хърта пьстраıа бѣлогрѫдаıа съ воротъмь червлѥного золота на коѥмоу жьдо ѿ плечю до оушью · а тъ ѡ лѣвоуѭ потече на право а тъ ѡ правоуѭ почете на лѣво ıако дъвѣ чаици метаѭчи сѧ о нѥмь · а жеребьць єго четырьми копыты выкраѧи четыре колобы ıако четыре чаицѣ надъ нимь въ въздоусѣхъ то ли переди єго то ли зади єго · и бысть на нѥмь багровоє кързно и чьрвьць въ золотѣ ѡ коньцихъ · а къи жьдо чьрвьць ставъ въ съто коровъ · и дорогоє золото въ сапозѣхъ єго и въ стременьхъ · и лъгъкъ бысть ходъ жеребьчии ида къ воротомъ въ Арьтоурьи дворѣ

И рече молодьць Є ли воротарь?
И рекошѧ къ нємоу Єсть · а ты погоуби головоу свою отъ въпроса своєго · ıазъ воротарь Арьтоуроу коєго жьдо пьрвого дьне єноуарıа нъ соуть оу мене намѣстьници на прокъ веремене а се Ианъдавъ иже добро чюєть и Гогигуръ иже малыи мѧсоѣдъ и Хлаисьгеминъ иже тихаıа стопа а пакы Пеньпиніѡнъ иже ходить на головѣ да съпасеть свои нозѣ не зьрѧ ни небесъ ни землѣ нъ ıако камень котѧи по исподоу по дворьскомоу
И рече молодьць Ѿвори ворота
И тъ рече Не ѿворю
И рече молодьць Чемоу не хочеши ѿворити?
И тъ рече Ножь въшьлъ въ мѧсо а напои въ рогъ и людьє сѧ тѣсьнѧть въ гридьници въ Арьтоурьѥи · никомоу же не льга вънити опроче сыноу ѿ правьдьного кънѧзıа землѣ или же опроче дѣльника възнесъша дѣло своѥ · достоить ти имѣти кърмъ пьсомъ твоимъ и зьрно коню твоємоу и пьпьрѧнаıа мѧса собѣ и вино чересъ краи и пѣсни да тѧ тѣшити · а кърмъ на пѧть десѧтъ людии принесоуть ти въ гостиницю · Ѣдѧть тоу поутьници издалече съ сынъми ѡтъ инѣхъ земль · ти же бо не възнесоуть дѣлъ въ дворъ Арьтоурии · не боудеть ти тоу горѥ неже Арьтоуроу въ дворѣ · боудеть ти жена да съпати съ тобою и пѣсни да тѧ тѣшити · заоутра рано оже ворота ѿворѧть народоу иже пришьли нынѣ а тобѣ ворота пьрвомоу ѡтъворѧть и можеши си выбьрати сѣдалище въ гридьници въ Арьтоурьєи ѿ вьрхоу и до низа
И рече молодьць Ничего же сего не оучиню · Ѿвориши ли ворота и то добро · а не ѿтвориши а въздамь бещьстьє господиноу твоємоу и тобѣ лихоую славоу · и възъпию тришьды оу въхода оу воротьного и оуслышѧть и на вьрхоу въ Пенѣ Пеньгваидѣ въ Кърнъвалиѣ на долѣ въ Диньсолѣ на сѣверѣ и въ Ескаирѣ Оирьвелѣ иже въ Ирѧнѣхъ · а ѿ вьсѣхъ женъ тѧжькыхъ въ симь дворѣ ни одина ихъ не донесеть дѣтѧ своѥ а оу нетѧжькыхъ лона ихъ дънѣ отѧготѣють и не зачьноуть ѿ сего дьне николи же
И рече Глеоулоудъ Гаваильваоуръ Възъпи колико же хочеши противоу правьдѣ въ Арьтоурьємь дворѣ нъ толи не поустѧть тѧ оли же пьрьвоє не поидоу мълвити къ Арьтоуроу · и пришьдъ Глеоулоудъ въ гридьницѭ

И рече къ нємоу Арьтоуръ Принесеши ли ми вѣстъкоу отъ воротъ?
И тъ рече Принеслъ єсмь

Дъвѣ трети моєго живота миноулѣ
и дъвѣ трети твоєго
Былъ єсмь одиною въ Каєрѣ Сеи и въ Асеи
Въ Сасѣ и Саласѣ
въ Лоторѣ и въ Фоторѣ
Былъ єсмь одиною въ Иньдостанѣ великомь
и въ Инъдостанѣ маломь
Былъ єсмь одиною въ рати дъвою Инироу
оже дъва на десѧте тали ѧта въ Ноуръманѣхъ
А былъ єсмь одиною въ Еуропѣ
былъ въ Африкии
и на островѣхъ Кърсичѧньскыхъ
и въ Каерѣ Бретоусѣ и въ Бретасѣ и въ Нерьтасѣ
А былъ єсмь одиною тоу коли то єси погоубилъ загонъ Глѣишь сыноу Меринıа
коли то погоубилъ Милъ Дъвъ сынъ Дъгъмль
А былъ єсмь одиною тоу коли то єси переѧлъ Грькы на въстоцѣ
А былъ єсмь одиною въ Каерѣ Оетѣ и въ Аноетѣ
и въ Каерѣ Небенырѣ Наоуданьтѣ
и доблиѣ королѥвы моужѣ тоу єсмъ видѣли

Нъ николи же въ животѣ моѥмь не видѣлъ єсмь моужь тако красьнъ ıако онъ оу въхода при воротѣхъ въ сь часъ

И рече Арьтоуръ Пришьлъ ли єси ходѧ а выиди бѣга · къто же възьрить на свѣтъ и къто же ѿвьрзеть око и съмѣжить око а томоу забава · а одьни несѣте ємоу золотыѣ рогы съ напои а дроузии несѣте варьнаıа пьпрѧнаıа мѧса оли же боудеть ємоу до сыти кърма и питиıа · соромъ бо оставити въ вѣтръ дъжчь сего моужа ıако и́ повѣдаѥши
И рече Каи Роукою дроуга моѥго кльноу сѧ оже бы послоушалъ съвѣта моєго а не бы была правьда дворьскаıа къ нємоу перестоуплѥна
И рече Арьтоурь Нѣ тако · єсмъ добли доколѣ же инии насъ ищють · ıаче большѣ дары дароуємъ и таче больши доблѥсть наша и слава и чьсть

И Глеѵлоуидъ притече къ воротомъ и ѿвори ємоу ворота и аже вьси съсѣдошѧ съ конь оу воротъ на мостъцѣ а онъ не съсѣде нъ въѣха жеребьцьмь

И рече Кылоухъ Съдоровъ боуди о Вожю кънѧземь сего острова · да не боудеть ти горѥ въ дольнємь коньци хоромьномь нєже въ горьнємь а се привѣчаньє тако же и къ твоимъ доблиимъ и къ дроужинѣ и къ воєводамъ твоимъ · никого же привѣчанье да не минеть · ıако же привѣчаньє моє къ тобѣ вьсемирьно и тако же боуди вьсемирьна на семь островѣ милость твоıа и слово и чьсть
И рече Арьтоуръ Въ семь истина Б͠жıа о Вожю и ıазъ тѧ привѣчаю · сѧди же межю дъвоу вою съ пѣсньми да тѣшѧть тѧ и съ користьми кънѧжьими ıако кънѧзю настольникоу въ кънѧжьствѣ толико оже єси сьде · аче же роздѣлю дары межю гостии и межю поутьникъ из далече и тако боудеть съ тобою чьто нъ почьноу въ семь дворѣ
И рече молодьць Не пришьлъ єсмь сѣмо ѣсти пити нъ оже ми приѧти даръ боудоу подобьнъ ємоу и радъ възьмоу · пакы ли и не приємлю и́ а осквьрню тѧ аже до краи до земльныхъ къде нъ слава твоıа сѧжеть

И рече Арьтоуръ Хотѧ не сѣдиши сьде о Вожю нъ годѣ ти възѧти даръ ємоу же имѧ нарекоуть оуста твоıа и ѧзыкъ твои къде нъ вѣтръ соушить а дъжчь мочить а сълньце свѣтить а море досѧжеть а землıа сѧ простьреть нъ кромѣ моєго носада и корозна и Каледъбълха моєго мечıа и Хроньгоминѣада моєго копьа и Винебъгърѳѵхра моєго щита и Карьнъвенана моєго ножıа и Гвенъвибари моєѣ жены

И тъ рече Є ли въ семь истина Б͠жıа?
И рече Арътоуръ Радъ възьмеши · нареци же чьто нъ хочеши
И рече молодьць Нарекоу · хочю а ми оуимоуть волосы
И рече Арьтоуръ Боудеть ти

И възємъ Арътоуръ золотъ гребьнь и сьребрьны ножицѣ и оучеса волосы ємоу и въспроси «къто єси?»
И рече Арътоуръ Тепло сьрдьце моє къ тобѣ и знаю тѧ ıако отъ моєѣ кръви · рьци же къто то єси
И тъ рече Єсмь Кылоухъ сынъ Килюжь отъ сыноу Келюдонıа Оуледига ѿ Голеоудиди дъчере Аньлаоуди Оуледига ıаже ми мати
И рече Арътоуръ Право се · тако єси ми братанъ · повѣжь чьто то хочеши и боудеть ти чьто нъ нарекоуть оуста твоıа и ѧзыкъ
И тъ рече Є ли въ семь истина Б͠жıа и истина отъ кънѧжьства твоєго?
И рече Арътоуръ Рада єсть
И тъ рече Молю же тѧ въдати ми Олъвень дъчерь Исбададеньа Бенъкаоура и закльноу ю именьмь вои твоихъ

И закльнѫ свои даръ именьмь Гаıимь и Бедоуирьимь и Грѣдольимь и Гахлъдобижимь и Гоуиѳирьимь сыноу Грѣдольа и Граѣжимь сыноу Єриıа и Кинделижимь Гибаръвъда иже Вожıа и Таѳальимь Твъльимь Голавьимь иже ІАвьнъ Ѿстѫпъ и Мѣлъвишимь сыноу Бѣданьа и Книхоурьимь сыноу Неша и Кибьрчимь сыноу Дѣриıа и Фьркошимь сыноу Поша и Хлиберьимь Беоуѳашимь и Кърбильимь Бьрбашимь и Гвиньимь сыноу Єсниıа и Гвиньимь сыноу Ноуибрıа и Гвиньимь сыноу Нюжıа и Єдьрньимь сыноу Нюжıа и Кадоимь сыноу Гераньча и Флеоудоурьимь Флама волостелıа и Хриаоуньимь Бебирьимь сыноу Дораѳьıа и Брадъвеньимь сыноу Моренıа Минога и именьмь Мореньимь Минога самого и Далъдабьимь сыноу Киминıа Коба и именьмь сыновымь Алына Дъбеда и именьмь сыновымь Саиди и именьмь сыновымь Гоуриона и именьмь Ихъдрижьимь иже Стълпъ Бороньныи и именьмь Кинъвашьимь иже Ѡстрыи Жьзлъ и Гоухрырьимь иже Дебелыи Скотъ и Изберирьимь иже Котовъ Ѫкъть и Гахлъгоижьимь иже Оубоиникъ и имены Чьрнаго и Бода и Силы иже сынове Гваоуръѳижьи Гърба а си мѫжи ѡтъ пъкъльныхъ горъ притекъше и именьмь Килъжьимь иже Съто Роубежь и именьмь Єго иже Съто Роубежь и Съто Рѫкъ и именьмь Коръшимь иже Съто Ѫкъть и именьмь Єзгарьимь Гыхлоуха Гобънъкаоуна и Дроущимь иже Желѣзьнаıа Пѧсть и Глеоулъвижимь иже Крѣпъкыи Переємъ и Хлошимь иже Бьѭча Рѫка и Анъвашимь иже Крилатыи и Синошимь сыноу Семого и Вадъвымь сыноу Семого и Девѧтымь сыноу Семого и Гвенъвинъвиньимь сыноу Девѧтого сыноу Семого и Бедывьимь сыноу Семого и Гоброуıимь сыноу Єхелıа иже Сильноѥ Стьгно и именьмь Єхелıимь Сильного Стьгна самого и именьмь Мѣльимь сыноу Роиколıа и именьмь Дадварьимь иже Слѣпаıа Голова и именьмь Гаръвилıимь сыноу Гвыѳожıа Гоуира и именьмь Гвыѳожимь Гоуира самого и именьмь Горъманьчимь сыноу Ричина и именьмь Менъвымь сыноу Трьхъ Въпль и именьмь Дигоньимь сыноу Избытъкова и Селъбьимь сыноу Синоижа и Гизъжимь сыноу Ахенıа и Мочьным сыноу Сильного и Дридвашимь сыноу Тръфинıа и Тоуръшимь сыноу Перибьıа и Тоуръшимь сыноу Анъваша и Ионинымь королıа фрѧжьского и Сельимь сыноу Сельгиıа и Терегижьимь сыноу Иѣнıа и Мореньимь сыноу Иѣнıа и Сıаоуньимь сыноу Иѣнıа и Карадожимь сыноу Иѣнıа а си бѣшѧ мѫжи ѿ Каєра Даѳъла иже Арьѳоурь родъ по отьцю · и именьмь Оукоризнинымь сыноу Кавьа и именьмь Юстижимь сыноу Кавьа и именьмь Славьнымь сыноу Кавьа и Анъгаоуѳьимь сыноу Кавьа и Гобаньимь сыноу Кавьа и Келъньимь сыноу Кавьа и именьмь Стьбльнымь сыноу Кавьа и Мабъсаньчимь сыноу Кавьа и Гвынъгажимь сыноу Кавьа и Пѫтьнымь сыноу Кавьа и именьмь Чьрвлѥнымь сыноу Кавьа и и Мѣльжимь сыноу Кавьа и Кынъвальимь сыноу Кавьа и Кърмительимь сыноу Кавьа и Єрьгирьажимь сыноу Кавьа и Нѣчьимь сыноу Кавьа и Гильдашимь сыноу Кавьа и Калъкашимь сыноу Кавьа и Оуальимь сыноу Кавьа ···· и именьмь Самъсоньимь иже Соухаıа Гѫба и Тальєсиньимь иже Голова пѣвьцемъ и именьмь Манавиданьимь сыноу Хлирьа и Хларьимь сыноу Каснарьа Оуледига и Сьбериньимь сыноу Фльрганьча королıа Брьтаньского и Саранѡньимь сыноу Глъѳбырьа и Хлаоурьимь сыноу Єръвьа и Анъножимь сыноу Менъвьа иже Триє Въпли и Гвыньимь сыноу Ноуибреıа и Огньнымь сыноу Ноуибреıа и Гераньчимь сыноу Єрьбиньа и Єрьмижимь сыноу Єрьбиньа и Дъвельимь сыноу Єрьбиньа и Гвыньимь сыноу Єрьмижа и Кынъдроуиньимь сыноу Єрьмижа и Ибажьимь сыноу Одиного Мѧтьла и Ѣдоньимь сыноу Щедрого и именьмь Хрѣдоуньимь Ароуıа и Горъманьчимь сыноу Ричина · а се бѣ Арътоурь братъ по матери а отьць ємоу бѣ старѣишина Кърнъвальскыи · и именьмь Хлаоунъродежимь сыноу Бородатого и Нодаоульимь иже Оутѧтаıа Борода и Бьрѳьимь сыноу Кадова и Хрѣдоуньимь сыноу Белиıа и Изгобаньимь сыноу Даровитого и Изгавиньимь сыноу Баноньа и Мърбраньимь иже Великыи Воронъ сыноу Тегижа · а се ни мѫжь не възложи на нь орѫдьа своѥго въ Камъланѣ тѣмь же бѣ такы гноусьнъ оже вьси мыслишѧ и́ ıако дѣмѡнъ слоужьникъ и бѣ ємоу шьрсть ıако на олени · И именьмь Саньжимь иже Аньгелии Ликъ · а се ни мѫжь не възложи на нь лоучѣ своѥѣ въ Камъланѣ тѣмь же бѣ такы красьнъ оже вьси мыслишѧ и́ ıако аньгелъ слоужьникъ · И именьмь Кыноуильимь иже Свѧтыи а се одинъ ѿ Трьхъ бѣгъшихъ Камълана и бѣ въ коньци ида ѡтъ Арьтоура на своємь кони тъ же Старо ІАзьно

И Ѵхъдридъ сынъ Єримль и Єѵсъ сын Єримль и Єнъвасъ Єдѣньѡгъ иже Старыи Слоуга Крилатыи сынъ Єримль и Єнъбедестирь иже Старыи Стороньникъ сын Єримль и Съгильти Льгъка Стопа сынъ Єримль · а бышѧ симъ трьмъ мѫжемъ три вълшьбьныѣ хытрости · Єнъбедестирю николи же сѧ не сърѣте мѫжь поспѣваѧ за нимь на кони ли пѣшь ли · Єнъвасоу же Єдѣньѡгоу ни звѣрь о четырьхъ ногахъ николи же не възможе поспѣти за нимь на одиномь поли а тѣмь паче далѥ · а Съгильти Льгъка Стопа кѫды нъ бѣ хотѧ ити въ орѫдьихъ господина своѥго и николи же не ищѧ пѫти кѫды же ида · нъ оли же бышѧ деревеса а бѣ ходѧ по вьрхоу деревесъ и къде нъ бѣ гора и бѣ ходѧ по вьрхоу тръстьа и въ вьсемь житıи єго ни тръстина не полѧже ѥмоу подъ ногами и не поломи сѧ тако бо льгъкъ бѣ ·

Тѣѳии Старыи сынъ Гвинань єгоже сѧ кънѧжьство въ морѥ погрѫзи и тъ одинъ оутекъ и прииде къ Арьтоуроу а ножь єго бѣ ємоу вълшьбьнаıа сила · се бо ѿнели же приде сѣмо а ни черена сѧ не дьржа на нємь · и тѣмь сѧ розболѣ и ослабѣ за животъ свои а тѣмь же и помьре · А Карьнедырь сынъ Говенıѡнь Старого и Гвенъвинъвинъ сынъ Навль сь же Арьтоуорь передьнии поборьникъ и Хлегадридъ Ємысъ и Гоуръбодъвъ Старыи ıаже быста Арьтоурьа оуıа · Кильбанавыдъ сынъ Горıѡнь и Хленълеогъ Динарѳъ кънѧзь Сѣверьныи и Тѣрьнонъ Тоуръбъ Лианътъ и Тегъбанъ Глофъ и Тегырь Тальгехлогъ и Гоуръдиваль сынъ Єбреи и Мърганътъ Аѥль и Гвыстиль сынъ Ноуиѳонь и Хринъ сынъ Ноуиѳонь и Хлоуидевъ сынъ Ноуиѳонь и Гоуидръ сынъ Хлоуидевль ѿ Гвенабоуѣ дъчере Кавлѣ єго матере : Иаиль оуи єго бѣ проболъ и́ а тѣмь же въста коромола межю Арьтоура и Иаилıа ѿ тоѣ раны

Дремъ сынъ Дремидижь тъ же ѿ сада Кели Вига въ Кърнъвальи бѣ видѧ моухѫ възлѣтаѭчѫ рано съ сълньцьмь и далѥ аже до Пена Блаѳѡна въ Пикътѣхъ · И Ѣдоєль сынъ Нерь и Глоуидинъ Саєръ иже постави Єаньгъвенъ гридьницѭ Арьтоурѭ · а Кыниръ Кѣнъбаръвогъ рекомъ бѣ єго сынъ · Рече бо къ своєи женѣ Є ли одина часть моıа въ твоємь сыноу · о дѣво · и быти єго сьрдьцю стоуденоу въ вѣкъ и не быть тепла въ роукоу єго · а пакы сила єго вълшьбьна : є ли онъ сынъ ѿ моихъ а быти ємоу пьривоу · а пакы сила єго : нести ли ємоу ношю великоу ли малоу ли а невидима боудеть ношıа ни напереди єго ни назади єго · а пакы сила єго : никъто же не оутьрпить водоу и огнь ıако же онъ · а пакы сила єго : не быти иномоу слоузѣ ли слоужьбьникоу ıако же онъ ·

А Єнъвасъ Старыи Слоуга и Єнъвынебъ Старыи Ликъ и Єнъгыдимаиѳъ Старыи Дроугъ и иныи Галъгоигъ · а которомоу бы ни придеть городоу · а быти ли въ томь городѣ триє съта домове · и тъ хотѧ ли чего а не дасть никомоу же съпати оли же тоу єсть · И Бьрвынъ сынъ Кыренирь и Перисъ кънѧзь фрѧжьскыи а тѣмь бо сѧ нарече твьрдь Паризьскаıа · Осла Гыхлелъбаоуръ иже Великыи Ножь несѧ бы Бронъхлабнъ Фьрлиданъ · иже грѫдь ıако лезъ коли то бысть приити Арътоуроу съ гостьми къ краю къ бързиньномоу и искати ѫзъкого мѣста на водѣ и въставити ножь въ тоулѣ чересъ бързинѫ и се бысть мостъ добръ мѫжѥмъ ѿ Трьхъ Островъ Британьскыхъ и ѿ єѣ Трьхъ Ближихъ Островъ и съ полонъмь · А Гвидогъ сынъ Менестырь иже бысть погоубилъ Каи и Арътоуръ погоуби и́ съ братьєѭ єго мьстѧ Каи · И Гаранъвинъ сынъ Каи и Амъренъ сынъ Бедвирь и Єли сынъ Мырь и Хревъ сынъ Хроуидырышь и Хринъ Хридъвьрнъ и и Єли и Трахъмырь а сѫть Арьѳоурьи старѣиши ловьци · и Хлоуидевъ сын Килькоижь и Ѵабоуи сын Гоурıѡнь и Гвинъ Годъвронъ и Гваиръ Даѳаръ Вѣнидогъ и Гваирь сынъ Кадехлинь Тала Ариана и Гваиръ Гоурыдъ Еньвирь и Гваиръ Гвинъ Баладръ а сѫть Арътоурьи оуи · сынове Хлоушьи Хлава Оуиниога ѿ Тиреньского морıа и Хленъхлеогъ Оуиделъ и Аръдьрхогъ Прыдань и Касъ сынъ Саидиевъ и Гоуръванъ Гвалътъ Авоуинъ и Гоуиленьинъ кънѧзь Фрѧжьскыи и Гвитаръдъ сынъ Аижь кънѧзь Ирьскыи и Гарьселилъ Оуиделъ и Панаоуръ Пеньбагадъ и Атъленьдоръ сын Навии и Гвинъ Ѵваръ воѥвода Кърньскыи и Девоньскыи а се одинъ ѿ оурѧдивъшихъ рать Камъланьскоуѭ · Кели и Коуѥли и Гила Гоисыдъ иже тереби три съта поль одинымь скаканьемь старѣи скокъ ирьскыи

Солъ и Гвадънъ Осолъ и Гвадънъ Одаиѳъ · Солъ иже може стоıати одиноѭ ногоѭ вьсь дьнь · Гвадънъ Осолъ оже бы ємоу стоıати вьрхоу наибольшиѣ горы въ свѣтѣ а стала бы ровьнь подъ ногама єго · а Гвадънъ Одаиѳъ подобьны горѧчемоу желѣзоу ѧтоу ѿ печи искры ѿ стопъ єго оже нашьдъ пьрѭ и обрысаѩ пѫть Арътоуроу съ гостьми · Иръ Єроумъ и Иръ Атроумъ того дьне оже пришьдъша къ пироу и възѧста три сътогородии въ оугодьє собѣ · и пироваста до полоу дьне и писта до полоу ночи · а оже бысть има ити съпати глътаста голодъмь головъкы мъшичьѣ ıако нъ николи же не быста ѣла · а пришьдъша на пиръ не остависта мѧса сала ни горѧча стоудена ни солодъка кысла ни прѣсьна солона ни печена сурова

Оуваръваръ сын Алоунь иже бѣ вымолилъ ѡтъ Арътоура дара до сыта · и бысть сталъ одинъ ѿ Трьхъ великыхъ моръ въ Кърнъвальи и въ Девонѣ оли же ємоу было дано дара до сыта · и не осколоби сѧ оли же не бысть пълнъ · Гвараи Гвалътъ Єѵринъ дъвѣ пьсѧтѣ ѿ соукы Хрымьѣ ѣже Гвыдръдъ и Гвыденъ Астроусъ · Соугънъ сынъ Соугънедижь иже высъса море съ трьми съты носадъ аже ста соухыи пѣсъкъ · и бысть ємоу чьрвлѥна огницıа грѫдьнаıа · А Какамоури слоуга Арътоурь ıави ємоу стаѭ хотѧ и бысть въ стаи троудъ на пѧть десѧтъ ролии а тъ измолоти желѣзьнымь цѣпъмь дъскы и кънѣсы аже сташѧ ıако овьсѧнаıа мѫка въ коупѣ снопъ на дънѣ на стаиномь · Хлоуньгъ и Дыгиблоуньгъ и Аноиѳъ Бѣдогъ и Иръ Ѣдилъ и Иръ Амьренъ а та быста дъва ѿ Арътоуриихъ слоугъ и Гвебль сын Гвастажь дьньми оже бѣ печальнъ и бѣ съпоущаѧ нижьнѭѭ гѫбѫ собѣ къ поупоу а дроугаıа бысть ємоу клобоукъ на головѫ · Ѵхъдридъ Баръбъ Драоусъ иже бѣ вьргаѧ своѭ частѫѭ бородѫ ръдрѫѭ чересъ пѧть десѧтъ сломенъ въ Арьтоурьи гридьници · Єлидиръ Гибаръвидъ а Исъгърдабъ и Исъгъдидъ ıаже дъва бѣста ѿ слоугъ ѿ Гвенъвибарьихъ · а въ дѣлѣ бышѧ єю ногы бързы ıако єю мысли · Бръсъ сынъ Бръсеѳашь ѿ вьрхоу чьрноѣ папороти ıаже въ Придаинѣ и Гридьлоуинъ Горъ

Боулъхъ и Къбоулъхъ и Събоулъхъ
сынове Кледъбьи Къбоулъха
въноуци Кледъбьи Дибоулъха
Трьѥ блискаѭче блѣсци ихъ трьѥ щити
Трьѥ бьѭче оудари ихъ три соулицѣ
Трьѥ остри сѣчьци ихъ трьѥ ножи
Гласъ Глесигъ Глѣсиадъ ихъ трьѥ пьси
Калъ Квалъ Кабалъ ихъ трьѥ жеребьци
Поздѣ Несѫчиıа и Зъла Несѫчиıа и Цѣла Несѫчиıа ихъ три жены
Оувы и Кликъ и Въпль ихъ трьѥ въноуци
Мълниıа и Желıа и Ноужа ихъ три дъчере
Хоудаıа и Хоужьшиıа и Наихоужьшиıа ихъ три робы

Єиѵбръдъ сынъ Къбоулъшь и Велика Кость сынъ Силинъ и Гваиданъ сынъ Къньбелънь Кеѵдога и Поуилъ Полъчеловѣкъ и Доунъ Боуии Воѥвода и Ѣладаръ сынъ Пень Хларъкана и Кънедъръ Дивыи сынъ Ѥтоунь Сребрьноѣ Бръви и Савилъ Высокаıа Голова и Гвалъхъмаи сынъ Гвиарь и Гвалъабедъ сынъ Гвиарь и Гоуриръ Тълкъ Ѧзыкомъ тъ бо оумѣѧ вьсѣмъ ѧзыкомъ и Кеѳъдроумъ Попъ · Оухо сынъ Послоушьничь · оже тъ бы погребенъ семь сѧжень подъ землѥѭ и слышалъ бы моровии пѧть десѧтъ вьрстъ въдалѥ движѧ сѧ въ ложи своѥмь рано · Нарокъ же сынъ Направительнъ иже бы въбилъ ѿ Келиıа Вига ледоколъ въ Єсъгаирѣ Оирьбелѣ иже въ Ирѧнѣхъ просто межю ногома · Гвиаоунъ же Котьѥ Око иже бы ростѧлъ пеленѫ мъшици въ оцѣ не вередѧ же ока · Ѡлъ же сынъ Олъижь се бо семь лѣтъ пережє єго рожьствоу ѿ отьца єго свинии бысть въсхычено а оже възросте мѫжь и посочивъ свинии и приведе домови семьѭ стадъ · Бедъвинии Бискоупъ иже бѣ свѧтѧ Арътоурь кърмъ и питьѥ

Тако же кротъкы жены Острова сего съ золотыми гривьнами · опроче Гвенъвибари ıаже пьрваıа кънѧгыни Острова и Гвенъвибахы сестры єѣ и Раѳътѣни ıаже одина дъчи Клемемилиıа и Келемонь дъчи Каєва и Танъгвень дъчи Гваириıа Даѳара Вѣньдога и Гвеналаръха дъчи Кънъвальıа Канъоуха и Єѵрьнѣда дъчи Клъдьньıа Ѣдина Єневогъ дъчи Бедвирıа и Єнъхридрегъ дъчи Тидиѳарıа и Гвеноуледърь дъчи Гваредирıа Гърба и Єрьдидъбъль дъчи Тръбинıа и Єѵролоуинь дъчи Гоудолоуинıа Малого и Телери дъчи Пеѵлıа и Иньдегъ дъчи Гароуıа Высокого и Мърбидь дъчи Юрєнıа Хрегеда и Гвенъхлиань Правьдиваıа доблıаıа дѣва и Крѣдиладь дъчи Хлижıа Сьребрьнаıа Рѫка ıаже наивеликолѣпьнѣиши дѣва котораıа нъ бысть въ Трьхъ Островѣхъ британьскыхъ и Трьхъ Ближьнихъ Островѣхъ · и єѣ ради Гвиѳиръ сынъ Грѣдоль и Гвинъ сынъ Нижь бьєта сѧ въ травьни одинъ дьнь въ вѣкы и до Сѫдьного дьне · и Єлилъвь дъчи Неолıа Висѧчего Оуда и та бысть живѫчи въ три роды · Єлилъвь Бинъвень и Єлилъвь Бинъгыль · Въ имѧ вьсѣмъ симъ Кылоухъ сынъ Килижь закльне даръ свои

И рече Арътоуръ Се воєводо · николи же не чюлъ єсмь дѣвы о нєи же речеши ни о єѣ отьци матери · радъ въсълю сълы искати єѣ · а даи же ми веремене наити ю
И рече мальць Радъ дамь ти годъ ѿ нынѣ

Та же Арътоуръ въсъла сълы въ вьсѣ коньцѣ кыѣ жьдо землѣ искати ѭ · И по годоу съли сѧ воротишѧ и нашьдъше не болє вѣстии об Олъвени неже пьрвого дьне

Та рече Кылоухъ Вьси приѧли своѣ дары а ıазъ без дара · оушьдъ же оунесоу чьсть твою съ собою
И рече Каи Воєводо обидиши Арътоура паче мѣры · иди же съ нами · толи сѧ не ростанемъ ѿ тебе оли съвидиши оже нѣсть дѣвы никъде же въ свѣтѣ а оли налѣземъ ю

И въста Каи · Каи же бѣ вѣдѧ коудесы чинити · мога бо не дыхати подъ водоѭ девѧть ночии и девѧть дьнъ та же ити не съпѧ девѧть ночии и девѧть дьнъ · А ѣзвѫ ѿ меча ѿ Каѥва ни цѣлитель не възможе ицѣлити · Мѫдръ бывъ Каи · мога бо быти высокъ ıако же наивышьшеѥ дерево въ лѣсѣ оже бы хотѧ · пакы бѣ въ немь дивьноѥ · оже бы былъ дъжчь наигѫстѣишии нъ єже нъ бѣ дьржа въ рѫцѣ своѥи и ѡста соухо и соухо же на рѫкѫ вышѥ и на рѫкѫ нижѥ · се бо тако теплъ бѣ · оже бѣшѧ дроузи єго въ холодѣ а симь въжьже имъ огнище

Кликнѫ Арътоуръ Бедвира иже николи же сѧ не боıавъ похода ıако Каи шьдъ · А се бѣ ѡ Бедвирѣ ıако никъто же не бѣ крашии єго въ Островѣ опроче Арътоура и Дръха сыноу Кибдарıа иже зьркало · Се же тако и хотѧ бѣ одинорѫкъ не бѣшѧ и трьхъ вои иже бышѧ испоустили кръвь на томь же поли бържѥ єго · опрочьнаıа же хытрость ємоу бысть а се бѣ одинъ оударъ въ соулицѣ єго и девѧ противоу оударъ

И кличеть Аръртоуръ къ Кънъдълигоу Гъбароуидоу иже Вожь река Иди съ мъною искатъ мене ради съ воѥводою · Не бѣ бо хоужии вожь въ землѣ ѭже николи же не бѣ видѣлъ неже въ своѥи землѣ

И кличеть къ Гоурыроу Тълъкоу · тъ бо оумѣѧ вьсѣми ѧзыкы
И кличеть къ Гвалъхъмаю сынови Гвиарю · тъ бо николи же сѧ не вороти домови не нашьдъ того же быть пошьлъ искатъ · и бѣ наилоучии пѣшь и наилоучии на кони · бѣ же Арътоуроу сыновьць иже сынъ сестринъ и єго братанъ

Арътоуръ кличеть къ Менови сынови Тѣръгваижю · тѣмь же оже бы имъ притечи въ поганьскоуѭ землѭ и тъ бы заклѧлъ ѣ и никъто же бы не възмоглъ видѣти ѣ нъ они бышѧ видѣли вьсѣ

Идѫче же приидошѧ къ великои ровьни и оузьрѣшѧ костелъ и бѣ наиболии костелъ въ свѣтѣ · Идошѧ же вьсь дьнь и до вечера · оже мьнишѧ сѧ искрь костела нъ не бышѧ ближѥ неже оутрѣ · и быщѧ идѫче дьнь въторыи и трьтии и одъва притекошѧ тамо · бывъшимъ же имъ искрь костела и оузьрѣшѧ мъногоѥ стадо овьчеѥ и не бѣ ємоу межь · и пастоухъ на шеломене бѣ блюдѧ овьцѣ и кожьныи мѧтьлъ на нємь и косматыи пьсъ при нємь болии жеребьцıа о девѧти лѣтъ · а съвычаѥмь своимь николи же не изгоуби ѧгнѧте ни овьцѣ · николи же воиско не проминѫ єго не бывъ ıазвлѥно а доуханьѥ єго ижьже до тьла вьсıако мьртво дерево и вьсıакъ коустъ на ровьни

И рече Каи Гоурыре Тълъче иди рьци къ моужю къ томоу
А тъ рече Каю оурекоу сѧ ити ıамо же и ты поидеши · идѣвѣ же обьче
А Меноу сынъ Тѣрьгваижь рече Не бои сѧ тамо ити · се бо закльноу пьсъ и не оугрызеть никого же

И ти потекошѧ къ пастоухоу · и рекошѧ къ нємоу Оугодьнъ єси пастоуше
А тъ рече А не быти вы николи же оугодьнѣишими мене
А ти рекошѧ Єи Богоу · єси же надъ вьсѣми
И тъ рече Ничьто же мѧ не изгоубить опроче жены моєѣ
И ти рекошѧ Чьѣ же овьцѣ блюдеши и чии тъ костелъ?
И тъ рече Вы боуıаци · по вьсѣи земли вѣдомо людьмъ костьлъ сь за Исбададенъмь Бенъкаоуръмь
И ти рекошѧ А ты къто єси?
И тъ рече Єсмь Кыстенинъ сынъ Минуѥдижь а жены моѥѣ дѣлѧ мои мѧ братъ погоубилъ · а ты къто?
И ти рекошѧ Єсмъ съли ѿ Арьтоура ищюче Олъвени дъчере Исбададеньи Бенъкаоура
И тъ рече Не надобѣ вы моужи и застоупи вы Б͠гъ · вьсего свѣта дѣлѧ не чините сего · иже къто былъ пришьлъ просити а никъто же ихъ не оушьдъ живъ

И въста пастоухъ и въставъшю ємоу въда ємоу Кылоухъ золотыи напалъкъ · и тъ сѧ покоуси натъкнѫти и́ нъ не бѣ годѣ и вътъкнѫ и́ въ пальць рѫкавичьныи и пришьдъ домови и въда рѫкавицѫ женѣ ати съблюде и та выѧ напалъкъ из рѫкавицѣ

И та рече Моуже къде єси възѧлъ сь напалъкъ · не чѧсто бо наидеши дорогоѥ
И тъ рече Потекъ къ морю искатъ рыбъ и гадъ морьскыхъ и се оузьрѣлъ єсмь навь морьмь вынесенъ и николи же пережѥ не видѣлъ крашиєго нави и нашьлъ ємоу на пальци напалъкъ
И та рече Оувы моуже ıако море не носить навьного золота ıави ми навь
И тъ рече Жено въ бързѣ сьде оузьриши и́ иже навь єсть
И та рече Къто се?
И тъ рече Кылоухъ сынъ Килижь сыноу Келидоньа Оуледига ѿ Голеѵдиди дъчере Анълаоужьѣ матере єго и сь пришьдъ искати Олъвени

И бѣ жена недооумѧче · бѣ бо рада сестричю своємоу притекъшю къ неи нъ бѣ огорьчена оже николи же не бысть видѣла никого же пришьдъша просити и ѡставъша жива

И приидошѧ къ воротомъ при дворѣ пастоушьѥмь Кыстенина и жена оуслышавъши ѣ идѫче и рада побѣже къ нимъ оусърѣсти · Каи похыти колодѫ из дроужиıа и прииде жена оусърѣсти ѣ и въсхотѣ сѧ обѣсити имъ · Каи въложи єи колъ межю рѫкоу и та сътиснѫ и́ и ста вьрчена розга

И рече Каи Жено оже бы мѧ была тако сътисла и бездобь бы сѧ было кому сълѣгати съ мъною · была се зъла любы

Притекъше же домови и жьдоми бышѧ а поздѣѥ вьси сѧ бѣшѧ шатаѭче а жена ѿмъкнѫ ларь за печьѭ и выникнѫ из ларıа юньць ѡ кроковатомь волосѣ ѡ жьлтомь

И рече Гоухриръ Соромъ съкрывати сıакыи молодьць · вѣдѣ се не єго обида имь мьщена
И рече жена Сь єсть вьсе оже ми остало отъ дъвою десѧти и трьхъ сыновъ моихъ ѣже истѧ Исбададенъ Бенъкаоуръ · ни болє ми въ нємь надѣжѣ неже въ инѣхъ
И рече Каи Боуди сь подроугъ ми и кыи жьдо наю истѧтъ стане одино оже оба потѧта
И ѣдошѧ
И рече жена По коє єси ороудьє пришьлъ сѣмо?
И тъ рече Пришьли єсмъ искати Олъвени сего мальца ради
И рече жена Бога ради поидѣте въспѧть толи никъто же отъ костела не оузрѣлъ васъ
И рече Каи Богъ вѣсть не идемъ въспѧть доколѣ не оузьримъ дѣвы · выидеть ли въ мѣсто идеже ю оузьримъ?
И та рече Приидеть сѣмо по суботамъ волосъ си мытъ и оставить вьсѣ свои напалъкы въ котьлѣ въ нємь же сѧ мыєть · и та не приидеть по нѣ ни єѣ посъльникъ
И тъ рече Приидеть ли сѣмо оже по ню посълати?
И та рече Богъ вѣсть не хочю подроугоу погоубити ни хочю ю съльстити она бо ми вѣроу ємлеть · оже нъ сѧ оуречете не пакоситити єи и посълю по ню
И тъ рече Оуречемъ сѧ

И посълашѧ по нѭ и та прииде
въ пъртѣхъ поломѧноѣ шиды о собѣ
съ гривьноѭ чьрвлєного золота о дѣвиномь гърлѣ
съ камыкы и съ чьрвлєными съкровищи
И жьлтѣи рокытьного цвѣта бысть волосъ єѣ
И бѣлѣиши пѣны морьскоѣ бысть плъть єѣ
И бѣлѣише сыроѣ поушицѣ середи дробьноѣ рѣни въ вьрѫчеи криници бышѧ долони єѣ и пальци єѣ
Не око ıастрѧбьє по мыти ни око сокольє по трьхъ мытьхъ никоє же око не бысть ıасьнѣє єѣ
И бѣлѣиши грѫди лебѧдиноѣ бысть грѫдь єѣ
И чьрвлєнѣиши наичьрвлєноѣ напьрстьницѣ быста скорони єѣ
А къто нъ видѣ ѭ и испълни сѧ любъви къ нєи
И четыри сѧ конюшины ıавлıашѧ по нєи къде нъ проиде
По томоу же рекома бысть Олъвень

И се въшьдъши въ домъ и сѣде межю Кылоуха и высокого стольцıа · а тъ оузьрѣвъ и позна ѭ

И рече Кылоухъ Дѣво тѧ єсмь възлюбилъ · а идеши ли съ мъною?
И рече та Обличѧть ли на въ грѣсѣ и не идоу съ тобою отиноудь · мои бо отьць молилъ въдати слово оже не оутекоу без єго съвѣта · отьць бо имать жити доколѣ же възьмоу моужь · нъ въдамь ти съвѣтъ оже ли хочеши приѧти · иди къ отьцю къ моємоу проситъ моєѣ роукы и чего нъ отъ тебе въспросить а то обѣчаи обрѣсти и тѣмь мѧ обрѣтеши · нъ боуде ли ємоу вина сѧ соумьнѣти а мѧ не обрѣтеши и боуде ти спѣхъ оже животъ свои оублюдеши
И рече тъ Вьсе обѣчаю и обрѣтоу

Та же иде въ горьницѭ а вьси въставъше въслѣдитъ єи въ костелъ и потѧшѧ девѧть воротарь ıаже бысть при девѧте воротъ и никъто же єѣ не въскличе и девѧть хъртъ и никъто же єѣ не вереща · и вънидошѧ въ гридьницѭ

И рекошѧ Привѣчаємъ тѧ Исбададене Бенъкаоуре отъ Бога и отъ человѣка
И тъ рече А вы коуды идете?
И ти рекошѧ Пришьли єсмъ искати Олъвени дъчере твоєѣ за Кылоухъ за Килижь сынъ
И тъ рече Къде мои бездобьнии слоугы и проныри? Въставите вила подъ моѣ вѣцѣ да видѣти ми хотѧчь быти зѧть
И тако оучинишѧ
И рече Приидѣте заоутра и въдамь вы нѣкыи отъвѣтъ

И ти въсташѧ а Исбададенъ Бенъкаоуръ похвати о себе одинѫ ѿ трьхъ отравьныхъ соулиць ѿ камѧныхъ и вьрже ѭ въ слѣдъ ихъ · а Бедъвиръ переѥмъ ѭ и вьрже въспѧть и тѣмь прободе Исбададеноу Бенъкаоуроу колѣно
И рече Проклѧтъ боуди поганыи зѧть · а боудеть ми пакы хоужє ıако же сънидоу дьбрьмь · ıако пьсиıа моуха уıазвило мѧ желѣзо отравьноѥ · проклѧтъ боуди коваль иже исковалъ ю и ковальнıа на нєиже ковано · ıако вельми ми болить

А ночевашѧ ночь въ домоу въ Кыстенинѥмь · а заоутра на славѣ и съ дивьными гребьни въ кыкахъ вънидошѧ въ костелъ и въ гридьницѭ

И рекошѧ Исбададене Бенъкаоуре въдаи ны дъчерь въ мѣноу на дары и на вѣно дѣвичьє тобѣ и єѣ съродьницıама нъ али не въдаси а сърѣтеши съмьрть свою єѣ дѣлıа
И тъ рече Та и єѣ четыри прабабы и єѣ четыре прадѣди пакы живи и достоить ми отъ нихъ съвѣтъ възѧти
И рекошѧ Оучини тако а мы идемъ поѣстъ

Оже ти въсташѧ а тъ похвати о себе вътороуѭ ѿ трьхъ камѧныхъ соулиць и вьрже ѭ въ слѣдъ ихъ · а Менъвъ сынъ Тѣръгваижь переѥмъ ѭ и вьрже въспѧть и тѣмь прободе ємоу по середи грѫди и выиде соулицıа ємоу зади сквозѣ чересла
И рече Проклѧтъ боуди поганыи зѧть · ıако пиıавъка оугрызло мѧ желѣзо твьрдоѥ · проклѧта боуди печь въ нєиже рожьжено и коваль иже ѥ исковалъ · ıако вельми ми болить · ıако възидоу дьбрьмь и боудеть ми оузъко въ гроуди и боль въ черевѣ и боудеть ми бльвота
А ти потекошѧ ѣстъ

А трьтьєго дьне пришьдъше къ двороу и рекошѧ Исбададене Бенъкаоуре не вьрзи пакы въ ны ни възведеши вередъ и боль и съмьрть на сѧ
И тъ рече Къде моѣ слоугы? Въставите вила подъ моѣ вѣцѣ · вѣцѣ бо ми палѣ на очи да оузьрѣти ми хотѧчь быти зѧть
А ти въсташѧ а оже въставъше а тъ похвати о себе трьтьѭ ѿ трьхъ отравьныхъ камѧныхъ соулиць и вьрже ѭ въ слѣдъ ихъ · а Кылоухъ переѥмъ ѭ и вьрже въспѧть ıако же бѣ хотѧ и прободе ємоу око и выиде соулицıа ємоу ис тыла шииного
И рече Проклѧтъ боуди поганыи зѧть · оли живъ боудоу и мои възоръ боудеть хоужь а ıако потекоу противоу вѣтроу и очи ми сльзьми изидоуть а голова ми хочеть болѣти кроутити на кыи жьдо новыи мѣсѧць · проклѧта боуди печь въ нєиже рожьжено · ıако бы мѧ оугрызлъ бѣшеныи пьсъ тако мѧ проболо желѣзо отравьноѥ
А ти потекошѧ ѣстъ

А заоутра пришьдъше къ двороу и рекошѧ Не вьрзи пакы въ ны ни възведеши вередъ и боль и моученьє на сѧ и паче того коли въсхочеши · нъ въдаи ны дъчерь
И тъ рече Къде тъ иже ищеть моєѣ дъчере?
И тъ рече ІАзъ єсмь иже ищеть єѣ · ıазъ Кылоухъ сынъ Килижь
И тъ рече Выиди сѣмо да тѧ вижю
И поставишѧ ємоу стольць лицьмь къ лицю съ нимь
И рече Исбададенъ Бенъкаоуръ Ты ли ищеши моєѣ дъчере?
И тъ рече ІАзъ
И тъ рече Въдаи ми слово оже не хочеши ми льстиши ни мало
И тъ рече Въдамь ти слово
И тъ рече Аче ємлю чьто же отъ тебе въспрошю таче възьмеши мою дъчерь
И тъ рече Рьци чего же хочеши
И тъ рече Рекоу · видиши ли тоу великоую поущю?
И тъ рече Вижю
И тъ рече Велю ти выкоренити ю и ижечи по земли а бы попелъ оудобрилъ ю и велю възорати и въсѣıати а бы съзьрѣло къ оутроу оли же роса ростаєть а бы было съварено ѣсти-пити гостьмъ на твою женитвоу съ моєю дъчерью · ı вьсе то велю оучинити одинѣмь дьньмь
И тъ рече Льгъко ми оучинити се вьсе хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · се бо нѣсть земледѣлѣ орати тоу землю ли готовити ю опроче Амаиѳона сыноу Дѡньа · волею своєю не поидеть съ тобою ни поноудиши и
И тъ рече Льгъко ми оучинити се вьсе хотѧ ты си мьниши є нельгъко
А тъ рече Хотя ты оучиниши то вьсе нъ єсть чьто же не оучиниши · Гованонъ иже Великыи ковачь сынъ Дѡнь имать приити на краи землѣ въставити плоугъ · нъ одино ємлєть сѧ дѣлати своєю волєю правьдьного кънѧзıа дѣлѧ ни поноудиши и
И тъ рече Хотя ты оучиниши то вьсе нъ єсть чьто же не оучиниши · Вола Гоулоулижа Винава соупроужьна имаста тоу твьрдоую землю орати и не въдасть ıа своєю волею ни поноудиши и
И тъ рече Льгъко ми оучинити се вьсе хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · хочю бо соупроужьна Мелина Гванъвина иже Жьлта весна и Иха Бриха иже Пьстръ волъ
И тъ рече Льгъко ми оучинити се вьсе хотѧ ты си мьниши є нельгъко
А тъ рече Хотя ты оучиниши то вьсе нъ єсть чьто же не оучиниши · Вола же рогата а одинъ отъ дального коньцıа въ Менидѣ Банозѣ иже Рогата гора а дроугыи отъ сего коньцıа а съведена подъ одинъ плоугъ · Сıа бо Нинıавъ и Пѣбıавъ ıаже богъ обороти волама єю грѣхъ дѣлѧ
И тъ рече Льгъко ми оучинити се вьсе хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Видиши ли тоу чьрвленоую ролью?
И тъ рече Вижю
А тъ рече Оже єсмь пьрвоѥ сърѣлъ матерь тои дѣвѣ а девѧть секстарь льнѧного сѣмене было въсѣıано въ ролью · не чьрноѥ ни бѣлоѥ пакы не вышьло из нєѣ · пакы имамь тоу мѣроу · хочю а бы то льнѧноє сѣмѧ было въсѣıано въ свѣжю ролью тоу а бы стало бѣлъ повои на дъчерьнѣ головѣ на твоѥи женитвѣ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · медъ а бы былъ девѧтерицею соложь медоу ѿ пьрвого роıа бес троутъ и бес бъчелъ да съварити олъ медвѧныи на свѧтъкъ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · чаша Хлоуирıа сыноу Хлоуирıонıа ıаже дьржить наилоучьшии напои · се бо инокыи соудъ въ свѣтѣ иже можеть дьржати крѣпъкъ напои сь · не възьмеши єѣ оу нєго своєю волєю и не поноудиши и́ въдати
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · се же коробъ Гвидънавь Старого Гарана · оже бы сѧ вьсь свѣтъ съвъкоупилъ о нємь три девѧти съ рѧдоу а къи жьдо бы нашьлъ тоу кърмъ иже то ємоу годьнъ · хочю ѣсти ис того короба въ ночь коли то моıа дъчи имать съпати съ тобою · не въдасть ти єго своєю волєю и не поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · се рогъ Гулъгаоужь Гододина да излиıати намъ въ тоу ночь · не въдасть ти єго своєю волєю и не поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · се пѣсньница Тѣрьтъвлıа да обеселити мѧ въ тоу ночь · оже къто въсхочеть и та играєть · оже въсхочеть тишины и та оумълкнеть · не въдасть ти єѣ своєю волєю и не поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · се хочю пътъкъ Рианоньихъ ѣже боудѧть мьртвыѣ и оусъплıають живыѣ да обеселѧть мѧ въ тоу ночь
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · котьлъ Дюрьнашь Ирıанина старѣиша Одъгарıа сыноу Ѣдиıа кънѧзıа ирьского да варити ѣсти гостьмъ на женитвѣ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · надобѣ ми мыти волосы моѣ и бородоу брити и хочю кълъ Исгитроуинь ѿ Бѣлого Къла Старѣша Вепрь · и станеть ми годѣ толико ıако вытърженъ из головы єго живого
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · никъто же въ свѣтѣ не вытържеть и́ нъ тъкъмо Одъгаръ сынъ Ѣдии кънѧзѧ ирьского
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · никомоу же не въвѣрю беречи кълъ нъ тъкъмо Кавоу Придиньскомоу · шесть десѧтъ сътогородии Придиньскыхъ подъ нимь · волею своєю не поидеть ис кънѧжьства ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · надобѣ ми вычесати бородоу бритиıа дѣлıа и росправить сѧ борода толико єгда възьмеши кръвь ѿ Чьрнѣишеѣ Вълхъве дъчере Бѣлѣишеѣ Вълхъве отъ Печальноѣ Оудоли ıаже въ горахъ пекъльныхъ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Кры ми годьна тъкъмо възѧта тепла и тъкъмо одинъ соудъ дьржить кръвь теплоу а се стьклıаницѣ Гъвидолоуиньѣ Мальцıа онѣ же дьржѧть тепло аче волога въ нихъ вълиıана на въстоцѣ до досѧжениıа запада · волею своєю не въдасть ѣ ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · нѣкъто въсхочеть молока · наити молока вьсѣмъ єсть тъкъмо възѧвъ стьклıаницѣ Хриноньѣ Жестаıа Борода · волога сѧ въ нихъ не квасить николи же · волею своєю не въдасть ѣ ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · не соуть въ свѣтѣ чесала ни ножици да ми росправѧть бородоу · жеста бо єсть · нъ тъкъмо чесало и ножици лежѧче межю оушима Тоуръшима Троуиѳа кънѧзıа вепрıа сыноу Тарежа Оуледига · волею своєю не въдасть ѣ ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · изловити Тоуръха Троуиѳа мочьно тъкъмо єгда възьмеши Дрюдъвина щенѧ Зълобѣло Граижє сыноу Ериıа
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · нѣсть иного повода въ свѣтѣ да оудьржить и́ нъ тъкъмо поводъ Кършь Канта Евина
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · нѣсть иного ворота въ свѣтѣ да оудьржить поводъ тъ нъ тъкъмо воротъ Канастырь Кана Хлава
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · а се верига Килыжа Канастыра да оудьржить воротъ съ поводъмь
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · нѣсть иного ловьца въ свѣтѣ да ловити съ симь пьсъмь нъ тъкъмо Мабонъ сынъ Модронинъ иже былъ ѧтъ ѿ матере своєѣ оже было ємоу триє дьни ѿ родоу · никъто же не вѣсть къде же єсть ни въ коємь же образѣ єсть · живъ ли мьртвъ ли
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Гъвинъ Мыньдоунъ конь Бѣлотьмьногривъ а сь бързъ ıако вълна подъ Мабонъмь да изловити Тоурха Троуиѳа · волею своєю не въдасть ѣ ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Мабона не наити се бо никъто же не вѣсть къде же єсть оли же не наидеши пьрвоє Ѣдоєлıа сыноу Аєрıа Оубоıа а се єго близокъ и не оскоудѣєть ища єго · сь бо ємоу пьрвыи братанъ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Гаръселидъ Виделъ Ирıанинъ иже старѣи ловьць въ Ирıанѣхъ · и Тоуръха Троуиѳа николи же не изловѧть без нєго
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · поводъ отъ бороды Дилюшѣ Бородатого · ничьто же ино не съдьржить тѣ дъвѣ пьсѧтѣ · и боудеть годьнъ одино коли възѧтъ отъ єго бороды живого и выстьргноутъ деревѧными клѣщи нъ никомоу же не дасть то оучинити оли живъ · нъ не годьнъ боудеть оже тъ боудеть мьртвъ · боудеть бо нетвьрдъ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · нѣсть пьсарıа въ свѣтѣ иже бы съдьржалъ дъвѣ пьсѧтѣ опроче Кънедъра Дикого сыноу Ѥтоунıа Прокаженого · сь же девѧтерицею дичаи наидичаишего звѣри на горѣ · николи же не възьмеши єго ни моѥѣ дъчере
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Тоуръха Троуиѳа не изловити доколѣ не наиденъ боудеть Гвинъ сынъ Нюжь · въ нь же б͠гъ въселилъ доухъ дѣмоньскыи ѿ Пькла да бы свѣтъ не изгыбноулъ · ѿтолѣ же не боудеть пожалованъ
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · не годьнъ боудеть Гвиноу ловѧчю Тоуръха Троуиѳа иныи жеребьць опроче Чьрного Дюва иже жеребьць Моровъ Оирьбедога
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · доколѣ Вилıамъ кънѧзь Фрѧжьскыи не притечеть и николи же Тоуръхъ Троуиѳъ не боудеть ловлѥнъ без нѥго · не годить сѧ ємоу кънѧжьства охабити и николи же не притечеть сѣмо
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · николи же Тоуръхъ Троуиѳъ не боудеть ловлѥнъ не възѥмъ сыноу Алюнıа Дъбеда · добрѣ бо пьсы поущаѥть
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · николи же Тоуръхъ Троуиѳъ не боудеть ловлѥнъ не възѥмъ Анеда и Аиѳлема дъвою хъртоу ıаже бърза ıако вѣтръ · николи же не была поущена на звѣрь ѥго же быста не избила
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Арътоуроу и пьсарѥмъ єго ловити Тоуръха Троуиѳа · тъ же крѣпъкъ моужь и не поидеть съ тобою ни поноудиши и́ · сею виною ходить въ моѥю роукоу
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Тоуръхъ николи же изловлѥнъ не боудеть доколѣ не възьмеши

Боулъхъ и Къбоулъхъ и Събоулъхъ
Сынове Килюжи Къбоулъха
Въноуци Кледъбьи Дибоулъха
Триє ıасьно ихъ сиıають щити
Три чьрство ихъ бодѧть соулицѣ
Триє остро ихъ тьноуть мечи
Гласъ и Глесигъ и Глесıадъ ихъ триє хърти
Каль Къвалъ Кабаль ихъ триє жеребьци
Оуирь Дъдоугъ и Дроугъ Дъдоугъ и Хлоуирь Дъдоугъ ихъ три жены
Охъ и Гаръмь и Диıасъбадь ихъ три вълхъви
Хлюхедь и Неведь и Ѣсьведь ихъ три дъчери
Дроугъ и Гваиѳь и Гваиѳабь Оль ихъ три робы

Ти триє моужи троубѧть своими рогы и прочии вьси приидоуть толи въпитъ оли никомоу же сѧ не печи паде ли небо на земь
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Мечь Оурънашь Волота а тъкъмо имь оутьнеши и́ · николи никомоу же не въдасть єго въ коуны ли въ даръ ли · ни поноудиши и́
И тъ рече Льгъко ми оучинити се хотѧ ты си мьниши є нельгъко
А тъ рече Хотѧ ты оучиниши то вьсе нъ єсть чьто же не оучиниши · Бе съна боудеши и бес покоıа по вьсѣ ночи ищѧ вьсего того · нъ николи же не оучиниши того ни възьмеши моѥѣ дъчере
И тъ рече Възьмоу конѣ и коньникы а Арьтоурь мои господинъ и съродьникъ ємлєть ми то вьсе · а ıазъ възьмоу ти дъчерь и ты головоу положиши
А тъ рече Ємли же сѧ поути въ бързѣ и не тобѣ сѧ печи кърмъмь и пърты моѥи дъчери · ищи того вьсего а оже наидеши да и възьмеши дъчерь мою

И бѣшѧ ѣхали того дьне и до вечера доколѣ оузьрѣшѧ камѧныи костелъ а се наикрѣплии костелъ въ свѣтѣ
И се възьрѣшѧ и идѧ къ нимъ ѿ костела мѫжь чьрнъ кыкоѭ и бысть болии трьхъ мѫжь въ семь свѣтѣ

Forþ cymþ...

К началу